దక్షిణ భారత దేశంలో బి.జె.పి పార్టీ విస్తరణకు అహరహం శ్రమిస్తూ వచ్చిన వెంకయ్య నాయుడుగారు బాబా రాందేవ్ తలపెట్టిన అవినీతి వ్యతిరేక పోరాటం వెనక ఆర్.ఎస్.ఎస్ ఉన్నట్లుగా పరోక్షంగా అంగీకరించాడు. "అవినీతి వ్యతిరేక పోరాటం వెనక ఆర్.ఎస్.ఎస్ ఉంటే తప్పేమిటి?" అని ఆయన ప్రశ్నించారు. దానితో ఆర్.ఎస్.ఎస్ పాత్ర ఉందనేది స్పష్టమైందనే భావించాల్సి ఉంటుంది.
2014 లో జరిగే పార్లమెంటు ఎన్నికల్లో ఓ రాజకీయ పార్టీ పెట్టి పోటీ చేస్తానంటున్న రాందేవ్ అవినీతి పోరాటం రాజకీయాలకు అతీతం కాదని ఇప్పుడిక చెప్పలేము. బాబా రాందేవ్ అరెస్టు, గెంటివేతపై బి.జె.పి ప్రత్యేకంగా నిరసన కార్యక్రమం కూడా చేపట్టినందున బాబా రాందేవ్ రాజకీయ భావాజాలం ఏమిటో కూడా అర్ధం అయినట్లేనేమో! కాని బి.జె.పి తరపునే కార్యక్రమం జరిపితే అది గుంపులో గోవిందంలా మారి తన ఐడెంటిటీ దెబ్బతింటుందనే ఉద్దేశ్యంతోనే రాందేవ్ వేరుగా ఉంటున్నాడని కొంతమంది వాదిస్తున్నారు. ఆయనకి రు.180 కోట్ల ఆయుర్వేద వైద్య, యోగా సామ్రాజ్యమని కూడా రాయిటర్స్ సంస్ధ తెలిపింది.
- ఇంతకీ రాజకీయ లక్ష్యాలు ఉన్న బాబా రాందేవ్ అవినీతి వ్యతిరేక పోరాటం స్వచ్ఛమైనదేనా?
- 2014లో ఎన్నికల్లో గెలిచేందుకు ఇప్పటినుండే ఇటువంటి ఆందోళనల ద్వారా పలుకుబడిని నిర్మించుకుంటున్న రాందేవ్ పోరాటం ప్రజల మేలుకు ఉద్దేశించినదేనా?
